24 лютага 2022 года ўзброеныя сілы Расійскай Федэрацыі афіцыйна распачалі ваенныя дзеянні на тэрыторыі Украіны. Дэ-факта ўлады Беларусі аказвалі дапамогу Расіі, дазваляючы выкарыстоўваць для нападаў сваю тэрыторыю, грамадзянскую і войсковую інфраструктуру. Планаванне і падрыхтоўка агрэсіўнай вайны праводзіліся загадзя і ўпотай ад беларускага грамадства. Цяпер Украіна дзейнічае ў мэтах самаабароны перад узброеным нападам, ініцыяваным Расіяй.

Мы асуджаем гэтыя дзеянні з боку Расійскай Федэрацыі і Рэспублікі Беларусь. Гэта выклік для бяспекі ўсяго свету, і мусяць быць прынятыя тэрміновыя і эфектыўныя захады па супрацьдзеянні гэтай агрэсіі.

Мы заклікаем міжнародную супольнасць аказваць любую даступную дапамогу Украіне, а таксама тым людзям, у каго ёсць магчымасць пакінуць тэрыторыю Украіны і шукаць бяспекі ў іншых дзяржавах.

Мы заклікаем людзей і арганізацыі аказваць дапамогу тым, хто застаюцца на тэрыторыі Украіны, ратуючыся перамяшчэннем з рэгіёнаў, у якіх вядуцца актыўныя баявыя дзеянні.

Мы выказваем заклапочанасць пра асабліва ўразлівыя групы, якія аказваюцца замкнёнымі ў сытуацыі вайны і не могуць нікуды рухацца, застаючыся пакінутыя сам насам з небяспекай і невядомасцю. Напрыклад, такія як людзі з інваліднасцю, людзі, якія перажываюць досвед галечы, людзі, якія перажываюць досвед бяздомнасці, маламабільныя групы насельніцтва ў сілу ўзроста і самотныя, людзі, якія знаходзяцца ў сытуацыі абмежавання свабоды.

Мы заклікаем бакі канфлікту памятаць пра нормы і прынцыпы міжнароднага гуманітарнага права і прытрымлівацца іх, уключаючы забарону на накіраваньне нападаў на мірных жыхароў і гуманнае стаўленне да ваеннапалонных.

Вайна вядзе да чалавечых ахвяр, агульнага пагаршэння сытуацыі з правамі чалавека і гуманітарных крызісаў, і не можа быць вырашэннем праблем у цывілізаваным грамадстве.
Мы выступаем супраць вайны выказваем салідарнасць і падтрымку ўкраінскаму народу ў барацьбе за суверэнітэт і адстойванне сваёй тэрыторыі.